MOUVMAN POU DEFANN DWA AK ENTERÈ PÈP AYISYEN

Apre nou fin konstate pa gen okenn òganizasyon politik nan peyi a ki bay tèt yo kapasite pou defann enterè pèp Ayisyen an, nou pran responsablite nou devan BONDYE ak listwa pou nou kreye yon Mouvman politik pou Defann Dwa ak Enterè Pèp Ayisyen. MODDEPA se yon mouvman politik pwogresis yon gwoup ayisyen k ap viv ann Ayiti ak nan dyaspora a mete sou pye pou nou kapab konekte e rasanble tout frè n ak sè n yo kèlkeswa kote y ap viv;  epi fè yon konbit pou devlope, modènize, etabli sekririte pou Ayiti ka tounen yon paradi pou tout pitit li yo. Nou pran inisyativ sa a  pou nou kreye MODDEPA apre nou konstate pou gen okenn òganizasyon oubyen pati politik ki gen ni volonte, ni kapasite  pou retire Ayiti nan labim li twouve l la depi digdantan. Epi tou, lè nou tande anpil ayisyen toupatou ap di "ti rès la pou Ayiti," nou menm nou pran angajman pou nou bay 100% pou Ayiti.

Nan 30 ane ki soti pase la yo, nou konstate tout swadizan pati politik ki parèt   devan sèn lanrive disparèt apre moun ki te fonde yo a malad ou mouri. Epi tou, gen ti gwoup politik ki pa menm gen 10 moun, epi yo rele tèt yo pati politik. Jeneralman yo parèt lè gen eleksyon; tout swit apre, yo disparèt tankou lafimen. Depi rejim Duvalier a fin tonbe an 1986, tout swazidan pati politik ki parèt yo toujou kòmanse Pòtoprens ant yon ti gwoup zanmi; apre sa yo chèche kèk grenn manm nan pwovens yo. Lè nou gade nan peyi vwazen nou yo, tankou Sendomeng, Jamayik, Kostarika, gen pati politik ki gen plis pase 80 ane depi yo egziste. Lè nou konstate chak swadizan lidè politik se goumen y ap goumen pou pataje pouvwa avèk kèlkeswa moun oubyen gwoup moun ki twouve yo nan tèt peyi a. Nans sans sa a, nou ka di peyi nou an poko genyen pati politik. Nan yon sistèm demokratik, si pa gen pati politik ki byen òganize, pap gen estabilite. Nou konnen byen rezon  ki fè se toujou grennsenk ak manfouben ki toujou rive nan tèt peyi a depi 38 lane ki sot pase yo se paske nou pa genyen okenn pati politik nan peyi a.

Akoz absans pati politik nan peyi nou an, nou remake nan  ane 2006, tout gouvènman ki monte yo  se yon bann  analfabèt fonksyonèl Core Gwoup - ansanm avèk kèk gwo komèsan apatrid ki mare sosis yon ak blan meriken  - mete nan tèt peyi a. Ti gwoup  komèsan rapas sa yo kontwole gouvènman sa yo ansanm ak tout richès ki nan peyi a. Ki rezilta sa bay? Nou wè peyi plonje pi fon toujou nan labim chak.  Gouvènman souflanchou sa mete bandi ak zanm nan kapital ak nan kèk depatman pou simen laterè ak lanmò. Klima ensekirite sa a gouvènman ak yon sektè nan gwo komèsan yo mete nan peyi a fè yo vin pi rich alòske majorite pèp la plonje nan plis mizè ak dezespwa. 

Tout sistèm ekonomik peyi fin degrenngole. Agrikilti peyi a pa menm ka nouri mwatye nan popilasyon an. Enpòtasyon machandiz ki soti nan lòt peyi ogmante san rete ; popilasyon an pa  jwenn  okenn swen sante ; enflasyon lakòz pri tout bagay monte twò wo.  Anpil fwa moun ki rete nan pwovens yo gen lajan nan men, men yo pa ka jwenn anyen pou yo achte. Avèk lavi ki vin enposib toupatou ann Ayiti, anpil  moun kitee peyi a pou y ale Sendomeng, Chili, Brezil, Ajantin, Etazini, Kanada, Frans, elt.

Kòm peyi pa ka mouri, nou menm kòm sitwayen responsab pran yon rezolisyon pou travay ak tout ayisyen ki vle pou nou kapab retire Ayiti nan twou sa a patripòch yo lage l depi byen lontan. Nou angaje nou nan konba sa pou kreye kondisyon pou lespwa boujonnen kote tout sitwayayen ayisyen, espesyalman pou jenès la ak jenerasyon k ap vini yo. Nou santi nou gen yon obligasyon ak yon devwa patriyotik pou nou kreye yon enstitisyon politik ki bay tèt li kapasite ak mwayen ki nesesè pou defann dwa ak enterè tout ayisyen pa tout mwayen ki posib e  imajinab ; espesyalman pou frè n ak sè nou yo k ap sibi eksplwatasyon depi apre asasinay Emperè Desalin.

Pou enkripsyon, ale sou lyen sa  a: ENSKRIPSYON